Msanii wa muziki wa hip-hop na mtayarishaji kutoka Marekani, Sean Combs, anayejulikana sana kama P. Diddy, anatarajiwa kufikishwa mahakamani Jumatatu hii katika mahakama ya shirikisho ya Manhattan. Anakabiliwa na mashtaka mazito ikiwa ni pamoja na usafirishaji haramu wa binadamu kwa ajili ya ngono, kusafirisha watu kwa madhumuni ya ukahaba, utekaji nyara, hongo, na vurugu.
Kesi hii inaanza kwa kuchaguliwa kwa baraza la majaji na inatarajiwa kuwa miongoni mwa kesi zinazofuatiliwa kwa karibu zaidi nchini Marekani mwaka huu.
Mnamo Mei 5, 2025, gwiji huyu wa muziki mwenye umri wa miaka 55 atakabiliwa na mfumo wa sheria wa Marekani huko New York, akishtakiwa kwa kutumia umaarufu wake kutekeleza vitendo vya ukatili na unyonyaji wa kingono.
Combs, ambaye amejipatia utajiri mkubwa tangu miaka ya 1990 kupitia muziki, mitindo, na vinywaji vya pombe, anakabiliwa na uwezekano wa kifungo cha maisha endapo atapatikana na hatia.
Alianzisha lebo ya Bad Boy Records, iliyowainua wasanii kama Mary J. Blige na marehemu rapa The Notorious B.I.G. hadi kufikia umaarufu mkubwa.
Baada ya miezi minane ya kuzuiliwa kufuatia kukamatwa kwake kwa kishindo huko Manhattan, Combs anakabiliwa na madai ya unyanyasaji wa kingono kutoka kwa zaidi ya watu mia moja, wakiwemo wanawake na wanaume.
