Jumanne, Aprili 22, Mahakama ya Mwanzo jijini Abidjan ilitoa uamuzi wa kumzuia Tidjane Thiam kugombea urais nchini Côte d’Ivoire, ambapo alikuwa ametajwa kuwa mmoja wa viongozi wakuu wa upinzani.
Tidjane Thiam kwa sasa ni Mwenyekiti wa Bodi ya Rwanda Finance Ltd, taasisi inayosimamia Kigali International Financial Center (KIFC).
Alikuwa amependekezwa na Chama cha PDCI, ambapo pia ni kiongozi mkuu, kuwa mgombea wake katika uchaguzi wa urais unaotarajiwa kufanyika Oktoba mwaka huu.
Mahakama ilisema sababu kuu ya kumzuia ni kuwa tayari alipoteza uraia wa Côte d’Ivoire baada ya kupewa uraia wa Ufaransa mwaka 1987.
Akijibu uamuzi huo, Thiam alilaani vikali hatua hiyo, akiitaja kuwa “pigo kwa demokrasia na kunyima haki ya mamilioni ya wapiga kura.”
Aliongeza, “Sishangai uamuzi huu umetolewa wakati wafuasi wetu wanazidi kuongezeka.”
Kwa namna ya pekee, alikosoa chama tawala cha RHDP, ambacho kimekuwa madarakani kwa miaka 15, kwa kuogopa kushindana kwenye uchaguzi huru na wa haki.
“Wanataka kuhodhi madaraka badala ya kukubali maamuzi ya wananchi,” alisema Thiam.
Thiam anakuwa mgombea wa nne wa upinzani kuondolewa kwenye kinyang’anyiro hicho, wakiwemo viongozi wengine wakuu kama Rais wa zamani Laurent Gbagbo.
Mpaka sasa, chama tawala cha RHDP hakijatangaza mgombea wake, japokuwa inatarajiwa Rais Alassane Ouattara atagombea tena.
