Perezida Evariste Ndayishimiye w’u Burundi, yambitswe umudali w’icyubahiro na mugenzi we wa Guinée-Bissau, Umalo Sissoco Embalo.
Ndayishimiye ari i Bisau kuva ku wa Mbere tariki ya 15 Nzeri, mu ruzinduko rw’akazi yahagiriraga.
Ibiro bye byatangaje ko umudali wa mbere w’icyubahiro yambitswe na mugenzi we Embalo uri mu rwego rwo kumushimira ku bw'”uruhare rwe mu guteza imbere ubucuti bushingiye ku bufatanye hagati y’abaturage b’ibihugu byombi.”
Ndayishimiye wanagiranye ibiganiro byo mu muhezo na Perezida wa Guinée-Bissau, ku wa Kabiri yanashyikirijwe urufunguzo rw’umujyi wa Bisau na Meya wawo nk’ikimenyetso cy’icyubahiro; anahabwa sitati yo kuba umuturage w’icyubahiro wa Guinée-Bissau.
Uruzinduko rwa Ndayishimiye muri Guinée-Bissau rurakurikira urwo Perezida Umaro Sissoco Embalo yagiriye mu Burundi muri Mata uyu mwaka.
Icyo gihe Ndayishimiye wari kumwe n’umugore we, Ndayubaha Angeline bamuhaye impano y’ingoma.
