Umunyapolitiki akaba n’umushoramari wo muri Nigeria, Peter Gregory Obi, yatangaje ko yiteguye kuvuguruza komisiyo y’igihugu y’amatora, INEC, akerekana ko ari we watsinze amatora y’Umukuru w’Igihugu, aho kuba Bola Tinubu.
Tariki ya 1 Werurwe 2023, INEC yatangaje ko Tinubu wari umukandida w’ishyaka APC riri ku butegetsi yagize amajwi 36%, akurikiranwa na Atiku Aboubakar wagize 29%, Peter Obi waje ku mwanya wa gatatu agira 25%.
Obi kuri uyu wa 2 Werurwe yagiranye ikiganiro n’abanyamakuru, abimenyesha ko yatsinze amatora kandi ko azifashisha inzira zikwiye mu kubyerekana.
Yagize ati: “Namaze gukora ikiganiro mpuzamahanga n’itangazamakuru. Ndasaba abanya-Nigeria gushikama. Twatsinze aya matora kandi tuzabyereka abanya-Nigeria. Tuzisubiza manda yacu binyuze mu nzira ziteganywa. Nyamuneka ntimucike intege!”
Uyu munyapolitiki kandi yaganiriye n’indorerezi z’umuryango w’ubumwe bw’Uburayi zakurikiranye aya matora, azisobanurira ko atemera ibyatangajwe na INEC. Ati: “Uyu munsi kare nagiranye inama nyunguranabitekerezo n’abagize misiyo y’indorerezi y’umuryango w’ubumwe bw’Uburayi.”
Ikinyamakuru Punch cyo muri Nigeria kivuga ko Obi agiye kwitabaza urukiko kugira ngo ruteshe agaciro intsinzi yemeza ko komisiyo y’amatora yahaye Tinubu.
Peter Obi yabaye Guverineri wa Leta ya Anambra kuva mu mwaka w’2006 kugeza mu 2014. Mu matora yari umukandida uhagarariye ishyaka Labour Party.
