Umunyemari Bola Ahmed Tinubu usanzwe ari umuyoboke w’ishyaka APC (All Progressives Congress) riri ku butegetsi muri Nigeria, yatsinze amatora y’Umukuru w’Igihugu.
Komisiyo ya Nigeria ishinzwe amatora, INEC, kuri uyu wa 1 Werurwe 2023 yatangaje ko Tinubu w’imyaka 70 y’amavuko yatsindiye ku majwi 36%, akurikirwa na Atiku Abubakar wagize 29%, hakurikiraho Peter Obi wagize 25%.
Nk’uko BBC ibyemeza, Tinubu ni umwe mu bakire b’abanyapolitiki bo muri Nigeria, akaba yarabaye Guverineri w’intara ya Lagos, ndetse agira uruhare runini mu kuvugurura isura yayo, iba imwe mu mijyi y’icyitegererezo mu gihugu.
Tinubu yayoboye Lagos kuva mu mwaka w’1999 kugeza mu 2007. Iterambere yayigejejeho ryatumye ahimbwa izina rya ‘Father of Modern Lagos’ (Umubyeyi wa Lagos Igezweho).
Umusaruro w’amatora INEC yatangaje ni uw’agateganyo. Mbere y’uko utangazwa, Atiku na Obi bari batangaje ko habayemo uburiganya, bityo ko agomba gusubirwamo. Tinubu we yatangaje ko yanyuzwe, asezeranya abanya-Nigeria ko yiteguye kubakorera, gukorana na bo, igihugu cyabo kikaba igihangange.
