Ikipe y’igihugu ya Nijeria y’umupira w’amaguru ibonye umudari wa Bronze mu mikino ya olempike iri gusozwa mu gihugu cya Brezili mu mugi wa Rio nyuma yo gutsinda bigoranye ikipe y’igihugu ya Honduras ibitego 3-2 ku mukino wabereye kuri Estadio Mineirao ku mugoroba wo kuwa 20 Kanama 2016.
Ikipe ya Nijeriya y’abato yari iyobowe n’umukinnyi wo hagati wa Chelsea John Obi Mikel yatangiye yotsa igitutu ikipe ya Honduras nubwo umuzamu wayo Luis Lopez yayibereye ibamba. Nijeriya yakomeje kwataka birayihira iza gutsinda ibitego 3-0 nubwo yaje kwishyurwamo bibiri ari nako yotswa igitutu mu minota ya nyuma.
[xyz-ihs snippet=”google-pub”]
Igice cya mbere cy’umukino cyarangiye ikipe zombi zinganya 0-0 nubwo Nijeriya yari yahushije amahirwe menshi. Ibitego bya Nijeriya byatsinzwe na Umar Sadiq Ku munota wa 49’ na 71’ ndetse na Aminu Umar ku munota wa 56’. Ku ruhande rwa Honduras, ibitego byatsinzwe na Anthony Lozano ku munota wa 71’ na Marcelo Pareira ku munota wa 86’.
Umukino wa nyuma wo guhatanira umudari wa zahabu urahuza ikipe ya olempike (abatarengeje imyaka 23) ya Brezili n’ikipe y’igihugu y’u Budage. Mu mikino ya ½ Nijeriya yatsinzwe n’u Budage, Honduras itsindwa na Brezili.
Kanda hano ujye ubona amakuru yihuse kandi kugihe kuri Facebook no kuri twitter
Théogène U @Bwiza.com
