Umushakashatsi akaba n’umwarimu muri Kaminuza yo mu Bubiligi, Philippe Reyntjens avuga ko n’ubwo Perezida Nkurunziza yatangaje ko ataziyamamaza mu matora yo mu 2020, ko aramutse yivuguruje ku ijambo nta gitangaza cyaba kirimo.
Mu kiganiro Philippe Reyntjens yagiranye na BBC yagarutse cyane ku iterambere ry’u Burundi mu myaka 14 ishinze CNDD-FDD ifashe ubutegetsi by’umwihariko akaba ari Perezida Nkurunziza ukiri ku ntebe y’ubuyobozi.
Petero Nkurunziza yatangarije Abarundi bose ndetse n’amahanga ko ataziyamamaza kuri uyu mwanya w’ubuperezida amazeho imyaka 14, ku bwa Philippe, ngo yisubiyeho akabikora ngo ubwo ntaho yaba ataniye n’abandi.
Yagize ati “Bibaye ngombwa akisubiraho akiyamamaza, njyewe n’abandi ntabwo byadutangaza cyane, kuko u Burundi bwabonwa nk’ ibindi bihugu, aho umukuru w’igihugu adashaka kurekura ubutegetsi”.
Reyntjens avuga ko hagiyeho undi muperezida mu Burundi, habaho impinduka mu mpande zose, haba mu bubanyi n’amahanga, Politiki, ubukungu,… ndetse ko uwajyaho mbere na mbere yaba arajwe ishinga no guhindura ibintu, akanabishyira ku murongo.
Mu cyumweru gishize mu kiganiro cyaciye kuri televiziyo y’u Burundi, umuvugizi wa Perezida, Amb Willy Nyamitwe yavuze ko “U Burundi bumaze kwiteza imbere biboneka kandi bwateguye neza amatora ya 2020”.
Perezida Nkurunziza yatsinze amatora nk’umukuru w’igihugu cy’u Burundi ku wa 19 Kanama 2005, ku munsi wakurikiyeho ahita arahira. Nyuma y’aho atangarije ko atazongera kwiyamamaza, ni benshi bacyekwa ko bashobora kuzatangwa n’ishyaka CNDD-FDD ngo arihagararire mu matora, bityo n’umugore we, Denise Nkurunziza akaba anugwanugwa.
