Ntibantunganya Sylvestre wayoboye u Burundi kuva mu mwaka w’1993 kugeza tariki ya 25 Nyakanga 1996 yamennye ibanga ahamya ko abakiri bato batazi kuri ‘coup d’état’ yakorewe na Pierre Buyoya wamusimbuye.
Uyu munyapolitiki, mu kiganiro yagiranye na Primo Media Rwanda, yisobanuye nk’umuntu ukunda gusabana n’abaturage. Ati: “Njyewe nakundaga kwitemberera za Kamenge, ngahura n’abandi bantu. Erega Umukuru w’Igihugu ni umuntu, akongera akaba umwenegihugu, ukamenya ngo iyi mirimo banshinze nirangira, nzakomeza kwiberaho nk’uko nsanzwe mbaho.”
Yavuze ko ubwo yatorwaga, inzego z’umutekano n’ubucamanza zari zishyigikiye Buyoya. Ati: “Ntabwo navuga ngo hari ikintu yari azi gihambaye. Aho ibintu bya coup d’état byorohera ni uko wasanga inzego z’umutekano, iz’ubutabera, twebwe twatowe zitatwiyumvamo, zikiyumva muri ba bandi twari twatsinze. Igisirikare n’ubucamanza bwiyumvaga mu butegetsi bwa Buyoya twari twatsinze. Ni bo bamugarukanye. Ni abasirikare bagize bati ‘Buyoya garuka’.”
Ibanga ahamya ko abakiri bato batazi ngo ni uko hashize iminsi ibiri Buyoya amukuye ku butegetsi, bombi baraganiriye, baterana amagambo kubera iki gikorwa. Ati: “Hari ikintu nakoze aba bakiri bato batazi. Njyewe nabonanye na Buyoya hashize iminsi ibiri ahiritse ubutegetsi. Yagize coup d’état ye ku itariki ya 25/07, ku itariki 27 twarabonanye. Naramubwiye nti ‘Buyoya ko dusanzwe duhura, tukavugana byose, none uburyo wahisemo ni ubu? Ntibuzakugeza iyo ujya.’ Tujya impaka.”
Buyoya we, ngo icyo gihe yasubije Ntibantunganya ko nta yandi mahitamo yari afite, keretse gusa kumukura ku butegetsi. Ati: “Buri umwe aca aha, aba ukwe.” Gusa yavuze ko kiba uyu munyapolitiki wabaye umusirikare akiriho, yari gusobanura byinshi kuri iki gikorwa.
Ntibantunganya yagiye ku butegetsi asimbuye Cyprien Ntaryamira warasiwe mu ndege mu Rwanda. Buyoya wamusimbuye we yayoboye u Burundi kuva mu 1996 kugeza mu 2003.
