Abantu batanu baguye mu mpanuka y’ubwato bwarohamishijwe n’imiyaga mu Kiyaga cya Tanganyika kuri uyu wa Kane ushize ahitwa Tembwe, mu birometero 90 ku nkombe z’Iamajyepfo ya Kalemie, mu Ntara ya Tanganyika muri Repubulika iharanira Demokarasi ya Congo. Imirambo yarohowe kuri uyu wa Gatanu, itariki 16 Kanama. Hari n’abandi benshi baburiwe irengero.
Iyi nkuru dukesha Radio Okapi iravuga ko imibare ishobora kwiyongera kubera ko ubu bwato bwitwa ‘Mali ni Mauwa’ bwahagurukaga I Moba, abarokotse bavuga ko bwari burimo abantu hafi 100.
Ubu bwato ngo bukaba bwarahuye n’imiyaga imaze icyumweru gisaga mu kiyaga cya Tanganyika. Ubu bwato ngo bukaba bwarabanje gucikamo kabiri mbere yo kurohama mu ijoro ryo kuwa Kane ushize, itariki 15 Kanama.
Umuyobozi wa Teritwari ya Moba, Didier Mumbere, wari mu butumwa i Kalemie, yavuze ko bigoye kuvuga umubare nyawo w’abapfuye, ababuriwe irengero n’abarokotse.
Kuwa 11 Ukuboza 2014, ubwato bwitwa MV Mutambala, bwari buturutse i Moba na none, nabwo bwahuye n’imiyaga ikaze ari ninjoro na none muri Tembwe mu Kiyaga cya Tanganyika, ntihagira umuntu n’umwe urokoka.
