Uyu munsi, Umunyamabanga Uhoraho muri MINUBUMWE, Eric Mahoro, yafunguye ku mugaragaro icyiciro cya munani cy’amahugurwa yo gutegura abagororwa bahamijwe ibyaha bya Jenoside yakorewe Abatutsi bitegura kurangiza ibihano. Ni amahugurwa agiye gutangirwa mu Igororero rya Nyamasheke, yateguwe ku bufatanye n’Urwego rw’u Rwanda Rushinzwe Igorora, RCS.
Mu ijambo rye, Mahoro yasobanuye ko inyigisho zitangirwa muri aya mahugurwa zigamije gufasha abarangiza ibihano gusubira mu muryango nyarwanda barahindutse koko, basobanukiwe uruhare rwabo mu kwimakaza Ubumwe n’Ubudaheranwa, birinda isubiracyaha cyane cyane ivangura, amacakubiri, ingengabitekerezo ya jenoside n’ibindi byaha bihungabanya umutekano w’abandi.
Yibukije abagororwa bitegura kurangiza ibihano ko aya mahugurwa bakwiye kuyafata nk’andi mahirwe Igihugu kibahaye, bakayabyaza umusaruro mu nyungu zabo n’iz’Igihugu cyacu muri rusange.
By’umwihariko, yabasabye kubakira ku ihame ry’ubunyarwanda no kubana neza n’abo basanze: imiryango yabo, abaturanyi n’abarokotse Jenoside yakorewe Abatutsi.
Yabashishikarije kurangwa n’ukuri no kurera neza ababyiruka batabatoza urwango, ahubwo bababwiza ukuri kw’amateka mabi yaranze Igihugu cyacu, yatugejeje kuri Jenoside yakorewe Abatutsi.
Yashimiye kandi yizeza ubufatanye inzego zose zigira uruhare mu gutegura iki gikorwa harimo Urwego rw’u Rwanda rushinzwe Igorora (RCS), abahagarariye inzego z’umutekano, abayobozi b’inzego z’ibanze, cyane cyane imiryango itari iya Leta n’imiryango ishingiye ku myemerere isanzwe ifite ibikorwa byo gusubiza mu buzima busanzwe abagororwa.
