Mu ijoro ryo kuwa 27 rishyira uwa 28 Kamena, umugore witwa Nyiraneza Venantie w’imyaka iri hagati ya 45 na 50, wari utuye mu Mudugudu wa Mushwati, Akagari ka Ngeri, Umurenge wa Munini mu Karere ka Nyaruguru, yapfuye bivugwa ko yishwe n’umugabo we, witwa Ruziranenge Callixte w’imyaka 49, amugobanyije ijosi.
Abaturanyi babo bavuga ko ahagana saa moya, umugore yatatse bamutabara bagasanga aryamye mu muferege uri munsi y’inzu yabo, yamaze gushiramo umwuka ngo afite agakomere gato mu ijosi.
Umuyobozi w’umudugudu wa Mushwati, Ngendakuriyo Denys, mu kiniga cyinshi, yagize ati: “Ni ko byagenze. Bampamagaye mu ma saa moya n’igice ko hari umugabo ukubise umugore we. Mpita nza niruka mpurira n’abagore babiri baturanye baje kuntabaza. Mpageze nsanga umugore aryame mu muferege hariya munsi y’inzu yabo yapfuye.
Turamuterura tumujyana mu nzu. Twahise dufata umugabo. Mpamagara Gitifu w’akagari na we ahamagara Polisi, iraza iramujyana. Naho umurambo ujyanwa mu bitaro byakarere bya Munini. Dukeka ko yamukubise imigeri cyangwa akamuniga kuko nta gikomere yari afite. Bari basanzwe bafite amakimbirane amaze igihe kirekire.”
Abaturanyi babo babwiye Bwiza ko nyakwigendera Nyiraneza n’umugabo we Ruziranenge bari bamaze imyaka isaga 5 batabana mu nzu ku buryo buhoraho kuko umugabo yari afite aho aba mu mudugudu w’i Ngeri bahawe nk’abarokotse jenoside yakorewe Abatutsi batishoboye, ariko umugore yaranze kumukurikirayo. Ahubwo yari yariguriye inzu ye bwite mu mudugudu wa Mushwati aho yabanaga n’abana be.
Ngo mu kwezi kwa Mata 2021, umugabo yakodesheje iyo nzu yo muri uyu mudugudu, agaruka kubana n’umugore we. Abandi baturage ariko babwiye Bwiza ko umugabo yari asanzwe aza kureba umugore, akanamugaburira, rimwe na rimwe akarara cyangwa agataha.
Ubwo twageraga ahabereye icyaha mu mudugudu wa Mushwati, twahasanze abaturage bafite amarangamutima n’imvugo bitandukanye bitewe n’uko muri uwo mudugudu hatuye imiryango ifite icyo ipfana na Nyiraneza n’indi ifitanye isano na Ruziranenge.
Umunyamabanga Nshingwabikorwa wumurenge wa Munini, Aphrodis Nkurunziza, yemeje iby’urupfu rwa Nyiraneza. Yagize ati: “Amakuru ni yo.(..). Ntituramenya neza niba umugabo yamwishe ku bwende cyangwa niba ari impanuka.(..). RIB iracyakora iperereza..(..). Rwose turasaba abaturage kujya begera ubuyobozi bukabakemurira ibibazo kuko kuvutsa umuntu ubuzima bigira ingaruka mbi nyinshi …”
Nk’uko Umunyamabanga Nshingwabikorwa w’Akagari ka Ngeri, Muhizi Reverien, abivuga, uwo muryango wari warasezeranye mu buryo bwemewe namategeko muri 1997. Bari bafitanye abana batanu.
Kurikira ibiganiro n’amavidewo binyura kuri Bwiza TV
