Uwahoze ari Perezida wa Leta Zunze Ubumwe za Amerika, Barack Obama yongeye kunenga Perezida Trump wamusimbuye ku butegetsi uburyo ari kwitwara mu rugamba rwo kurwanya icyorezo cya covid-19.
Ibi Obama yabitangaje mu butumwa bw’amashusho yagejeje ku bihumbi by’abanyeshuri bari barangije amasomo yabo ya kaminuza aho yavuze ko iki cyorezo cyatumye abayobozi bagaragaraho kuba badashoboye aho yavuze ko nibura bibananira no kujijisha ngo berekane ko iki cyorezo bazashobora guhangana na cyo.
Obama yaherukaga gutangariza mu nama yateranye mu buryo bw’iyakure ko uburyo ubuyobozi bwa Amerika burangajwe imbere na Perezida Trump buri kwitwara ari “akajagari karenze ukwemera.”
Mu kiganiro yageneye abanyeshuri barangije amashuri makuru na za Kaminuza zirenga ibihumbi kandi zakunze kurangwaho umwihariko wo kwakira abanyeshuri benshi b’abirabura,Obama yabashije gushyira ku karubanda ubuyobozi bwa Trump abunenga kugenda buhoro mu gukumira icyorezo cya covid-19 ndetse no kudasangiza amakuru y’iyi ndwara Abanyamerika.
Obama yagize ati: “Niba hari ikintu kimwe iki cyorezo cyakoze, kera kabaye cyaciye neza neza igitambaro cyapfukaga benshi cyane bari mu butegetsi bibwiraga ko bazi ibyo barimo gukora”. “Benshi muri bo nta nubwo bajijisha ngo berekane ko bashoboye”.
Mu butumwa bwe,Obama yanagarutse ku ngaruka iki cyorezo kiri kugira ku birabura bo muri Amerika.Aho yaguze ati”Icyorezo nk’iki kinamurika neza ku busumbane buriho ndetse n’imitwaro y’inyongera abirabura bakomeje kugenda bahura nabyo mu mateka yo muri iki gihugu.”
Muri Leta Zunze ubumwe za Amerika abasaga 90,000 bamaze guhitanwa n’icyorezo cya coronavirus mu gihe umubare munini wabo ari abirabura b’Abanyamerika.
SRC: Al Jazeera
