Itsinda ry’abiyahuzi batandatu kuri uyu wa Kabiri, itariki 12 Ukuboza, ryinjije ikamyo yari itwaye ibisasu mu kigo cya gisirikare giherereye mu majyaruguru y’iburengerazuba bwa Pakistan, mu gitero cyahitanye byibuze abasirikare 23, igisirikare cyavuze ko ari wo mubare munini w’abapfuye mu gitero kimwe muri iyi myaka ishize, mu gihe habura amezi atagera kuri abiri ngo amatora abe.
Igitero cy’imbunda n’ibisasu cyigambwe n’umutwe w’abarwanyi ba kisilamu, kije mu gihe abakurikiranira hafi ibya politiki bagaragaza impungenge zo kuba kw’ayo matora ateganijwe ku itariki ya 8 Gashyantare, mu gihe ibitero by’abarwanyi byagiye byiyongera mu majyaruguru y’iburengerazuba no mu majyepfo ashyira uburengerazuba.
Igitero cyabereye mu karere ka kure ka Dera Ismail Khan mu duce dutuwe n’abaturage batagendera ku mategeko twegereye Afghanistan nk’uko igisirikare cyatangaje mu itangazo cyasohoye mbere yo kongeraho ko abateye uko ari batandatu bose bishwe.
Abashinzwe umutekano babiri bari bavuze mbere ko abapfuye ari 24 nk’uko iyi nkuru dukesha Ibiro Ntaramakuru by’u Bwongereza, Reuters, ivuga.
Ingabo zari zashinze ibirindiro by’ibanze mu kigo cya polisi mu gace ka Daraban muri ako karere.
Itangazo ry’ingabo ryagize riti: “Kugerageza kwinjira muri ibi birindiro byaburijwemo neza, bituma abaterabwoba binjiza imodoka yari irimo ibintu biturika, hanyuma hakurikiraho igitero cy’ubwiyahuzi.”
Yongeyeho ko ibisasu byaturitse byatumye inyubako isenyuka, bituma hapfa abantu benshi.
Igisirikare cyavuze ko iki gitero kibaye umunsi umwe nyuma y’uko abasirikare babiri biciwe mu bikorwa bitandukanye byakorewe mu karere, hamwe n’abarwanyi 21.
Minisitiri w’intebe w’agateganyo, Anwaar ul Haq Kakar, yamaganye icyo gitero, nk’uko byatangajwe n’ibiro bye. Nyuma ku rubuga nkoranyambaga rwa X, rwahoze ari Twitter, yagize ati: “Nifatanije cyane n’imiryango y’abahowe Imana b’intwari. Tuzasubiza.”
