Ikipe ya Manchester United ibifashijwemo na VAR, yegukanye amanota atatu ya mbere muri shampiyona y’Abongereza y’uyu mwaka nyuma yo gutsinda hamana Brighton & Holve Albion ibitego 3-2.
Amakipe yombi yari yahuriye mu mukino w’umunsi wa kabiri wa shampiyona y’Abongereza wabereye ku kibuga Amex Stadium.
Manchester United yaherukaga gutsindirwa ku kibuga cyayo ibitego 3-1 na Crystal Palace, bityo ikaba yasabwaga gukora ibishoboka byose igakura amanota kuri Brighton.
Uwavuga ko Manchester United yarokokeye muri uyu mukino ntacyo yaba abeshye, dore ko Brighton yateye igiti cy’izamu incuro eshanu zose.
By’umwihariko umukino wari warangiye amakipe yombi anganya ibitego 2-2, gusa Manchester United iza guhabwa penaliti ya nyuma y’ifirimbi ya nyuma bitewe n’uko amashusho ya VAR yagaragaje ko myugariro Neal Maupay yari yakoreye umupira mu rubuga rw’amahina.
Ni penaliti yinjijwe na Bruno Fernandes ku munota wa 99 w’umukino, Manchester United yegukana amanota atatu atyo.
Ni bwo bwa mbere mu mateka ya Primier League ikipe ihawe penaliti umusifuzi yamaze kurangiza umukino.
Brighton & Holve Albion ni yo yari yabanje gufungura amazamu ibifashijwemo na Maupay kuri Penaliti yo ku munota wa 40, mbere y’uko myugariro Lewis Dunk yiyishyura icyo gitego ku munota wa 43.
Marcus Rashford yatsindiye Man United igitego cya kabiri ku munota wa 55 w’umukino, cyishyurwa na Solly March ku wa 95.
