Perezida wa Philippines, Rodrigo Duterte, ukunze gufata ibyemezo bikavugisha Isi yose, kuri iyi nshuro aravuga ko umuntu uri mu gihugu cye utazamera urukingo rwa Covid-19 azajya amufunga.
“Urahitamo, urukingo cyangwa ngufungishe,” aya ni amagambo ya Duterte kuri uyu wa Mbere mu kiganiro kuri televiziyo y’igihugu.
Igihugu cya Philippines kimaze kubonekamo abantu 1,300,000 banduye Covid-19 abagera ku 23,000 muri bo imaze kubahitana.
Nubwo bimeze gutyo, ngo abantu bitabira ibikorwa byo gukingira ni bacye cyane ahantu hatandukanye habugenewe mu murwa mukuru, Manila, kandi nubwo abashinzwe ubuzima bumvisha abaturage ko ari ingenzi gukingirwa, banavuga ko kwikingiza ari ubushake.
Perezida Duterte ariko yahisemo gukoresha undi muvuno kugirango abaturage bitabire kwikingiza kurushaho nk’uko iyi nkuru dukesha Reuters ivuga.
Ati: “Muri iki gihugu hari ikibazo. Ndakajwe cyane n’Abanyafilipine batumvira guverinoma.”
Kugeza ku Cyumweru gishize, Abanyafilipine miliyoni 2,1 nibo bari bamaze kwikingiza muri miliyoni zigera mu 110 zituye iki gihugu, mu gihe guverinoma ifite intego yo kuba yakingiye miliyoni 70 mu mpera z’uyu mwaka.
Duterte azwiho gufata ibyemezo bikakaye ku ngingo zitandukanye. Mu 2016, yatangije intambara yo kurwanya ibiyobyabwenge, abantu ibihumbi biganjemo ababicuruza n’ababikikwagaho bicirwa muri iyo ntambara.
Umushinjacyaha w’Urukiko Mpuzamahanga Mpanabyaha yasabye gukora iperereza kuri izo mpfu, ariko Duterte ku wa mbere yavuze ko atazakorana narwo.
Ati “Kuki nakwiregura cyangwa nkaregwa ibirego imbere y’abazungu?” Na none ati: “mushobora kuba muri abasazi.”
Kurikira ibiganiro n’amavidewo binyura kuri Bwiza TV
