Perezida wa Repubulika Iharanira Demokarasi ya Congo, Joseph Kabila yakoze impinduka muri polisi y’icyo gihugu no mu gisirikare ashyiraho umuyobozi mushya usimbura Gen. Charles Bisengimana, ari we Gen Dieudonné Amuli Bahigwa.
Izi mpinduka zatangajwe mu nyandiko yasinyweho na Perezida Kabila, yo ku wa mbere tariki ya 17 Nyakanga 2017 yatangajwe kuri televiziyo y’iki gihugu nkuko bigaragara ku rubuga rwa Radiyo Okapi.
Gen Dieudonné Amuli Bahigwa yari asanzwe ari umuyobozi wungirije mu biro bikuru by’ingabo za Congo ushinzwe ibikorwa by’ingabo.
[xyz-ihs snippet=”google-pub”]
Uyu muyobozi yahawe abandi babiri bamwungirije aribo Mushid Yav Patience, ushinzwe ubuyobozi muri polisi na Bengama Célestin ushinzwe imicungire ya polisi.
Mu bandi basimbuwe harimo, komiseri wa polisi mu mujyi wa Kinshasa, Gen Célestin Kanyama yasimbuwe na Gen Sylvano Kasongo Kitenge, wari komanda ushinzwe ishami ro kurinda inzego n’abayobozi bakuru.
Gen Célestin Kanyama yahawe ubuyobozi bukuru bushinzwe amashuri atangirwamo inyigisho za polisi.
Undi wahoze ari umuyobozi wungirije muri polisi i Kinshasa, Palanga Nawej Elvis yagizwe umuyobozi w ‘ishami rya polisi rishinzwe ubutabazi.
Kabila yashyizeho abandi bayobozi mu nzego zitandukanye za polisi, bamwe abohereza mu kiruhuko cy’izabukuru.
Umugenzuzi mukuru wa Polisi Gen Oleko na we yoherejwe mu kiruhuko, asimburwa na Chalwe Raus.
Impinduka mu gisirikare
Gen de Brigade Bonane Burore Louis yagizwe umuyobozi wungirije ushinzwe ibikorwa n’ubutasi mu karere ka 3 k’ingabo.
Col Boswane Moloma Gaby, yagizwe umuyobozi wungirije mu karere k’ingabo ushinzwe ibikorwa n’ubutazi mu gace ka Grand Kasaà¯.
Gen Bisengimana ni muntu ki ?
Charles Bisengimana Rukira yavutze tariki ya 21 Ukwakira 1964 mu ntara ya Kivu y’Amajyepfo muri Congo. Yinjiye mu gisirikare afite imyaka 20, ni ukuvuga mu 1985., icyo gihe yahawe impamyabumenyi mu masomo ya gisirikare mu ishuri ry’imyitozo ryo muri icyo gihugu. Mu 1989 yahawe impamyabumenyi mu by’amategeko, kugenza ibyaha n’ubumenyi bwa gisikare mu Misiri.
Yakoze nk’umukozi w’urwego rw’ubutasi I Kinshasa kugeza mu 1997, nyuma yinjiye mu mutwe wari ushinzwe kubohora Congo wa AFDR, wari ugizwe n’amashyaka menshi wari uyobowe na Laurent Desire Kabila. Kuva mu 2003 yasubiye I Kinshasa afite ipeti rya General nyuma y’amasezerano y’amahoro yahuje Abanyecongo, yatumye harangira intambara ya kabiri ya Congo.
Gen Charles Bisengimana yemejwe nk’umuyobozi mukuru wa Polisi ya Congo mu mwaka wa 2013 amaze imyaka itatu ari umuyobozi mukuru w’agateganyo, ubwo yasimburaga Gen. John Numbi yari yungirije, wari ukurikiranyweho uruhare mu iyicwa ry’abakozi babiri baharaniraga uburenganzira bwa muntu barimo Floribert Chebeya na Fidèle Bazana.
Charles Bisengimana yahoze ari mubacungaga umutekano ku butegetsi bwa Mobutu. Yagiye kandi ashingwa imirimo itandukanye mu nzego z’umutekano, aho yakunze gukorera mu ntara ya Bas Congo. Yakunze gushimwa ku bw’ibikorwa bye n’umurava mu kugarura umutekano mu baturage no guhana abapolisi bagaragaza ikinyabupfura gike.
Biravugwa ko Abanyecongo benshi batiyumvagamo Gen Bisengimana kubera ko usanga bamushinja kuba Umunyarwanda.
Kanda hano ujye ubona amakuru yihuse kandi kugihe kuri Facebook no kuri twitter
Ntakirutimana Deus
