Ikigo cy’igihugu cy’ibarurishamibare, NISR, cyamaze kubarura Perezida w’u Rwanda, Paul Kagame, n’umuryango we.
Ibiro by’Umukuru w’Igihugu, Village Urugwiro, byabitangaje kuri uyu wa 16 Kanama 2022. Byagize biti: “Perezida Kagame n’umufasha we Jeannette Kagame babaruwe mu gihe NISR yatangiye ibarura ry’abaturage n’imiturire ku nshuro ya gatanu.”
Bikomeza bisobanura ko Umuyobozi Mukuru wa NISR, Yusuf Murangwa ugaragara mu ifoto ari kumwe na Perezida Kagame na Jeannette, ari we wakoreze ibarura muri uru rugo.
Ibarura rusange ryatangiye kuri uyu wa 16 Kanama rizarangira ku wa 30 Kanama 2022. Rireba buri muturarwanda, abashyitsi ndetse n’abanyamahanga bari muri iki gihugu muri iki gihe.
