Perezida w’u Rwanda, Paul Kagame, yagiye muri Qatar kwitabira umuhango w’itangira ry’irushanwa ry’igikombe cy’Isi uraba kuri uyu wa 20 Ugushyingo 2022.
Ibiro ntaramakuru bya Qatar, QNA, bisobanura ko Umukuru w’Igihugu yageze i Doha ku kibuga cy’indege mpuzamahanga cya Hamad mu gitondo cy’uyu munsi.
Perezida Kagame yakiriwe na Minisitiri w’ububanyi n’amahanga wa Qatar, Ibrahim bin Yousef Fahro hamwe na Ambasaderi w’u Rwanda muri iki gihugu, Igor Marara Kayinamura.
Umukino ufungura iri rushanwa urahuriza ikipe ya Qatar n’iya Ecuador kuri sitade ya Al Bayt i Doha, guhera saa kumi n’ebyiri z’umugoroba. Urabanzirizwa n’ibirori.
