Perezida wa Repubulika ya Uganda, Yoweri Museveni kuri uyu wa 6 Kamena 2021 yategetse ko amashuri yose afungwa mu gihe cy’iminsi 42 bitewe n’ubwiyongere bw’ubwandu bw’icyorezo cya Covid-19 mu gihugu.
Mu ijambo yagezaga ku baturage ryatambutse ku bitangazamakuru bya Leta rirebana n’ingamba zo kwirinda Covid-19, Perezida Museveni yavuze ko guhera saa mbiri z’igitondo cy’uyu wa 7 Kamena, amasomo atemerewe gukomeza.
Yagize ati: “Amashuri agomba gufungwa guhera ejo. Abarimu bose bagomba gukingirwa, kandi nta wemerewe kwigisha.”
Kuva muri Werurwe 2020 ubwo iki cyorezo cyageraga muri Uganda, hamaze kubarurwa abantu 52,935 bacyanduye barimo 47,760 bagikize na 383 bapfuye, nk’uko imibare mishya ya Minisiteri y’Ubuzima ibyerekana.
Kuri ubu, iki cyorezo cyibasiye cyane ibigo by’amashuri kuva muri Werurwe 2021, ikaba ari yo mpamvu uyu Mukuru w’Igihugu yategetse ko amasomo aba asubitswe. Mu bigo 43 biri mu turere 22, habaruwe abagera kuri 948 banduye Covid-19.
Museveni abona ko ubu bwandu bukabije mu mashuri, bwatewe n’ukwirara kw’abanyeshuri n’abarimu babo, batubahirije amabwiriza yo kwirinda iki cyorezo.
Kurikira ibiganiro n’amavidewo binyura kuri Bwiza TV
