Perezida wa Uganda, Yoweri Museveni yanenze imikorere ya polisi y’igihugu kubera iraswa rya Gen. Katumba Wamala, umukobwa we n’umushoferi kuko ngo iyo iza kuba ikora neza, yari kumutabara hakiri kare.
Uyu Mukuru w’Igihugu yabitangarije mu ijambo yageneye abaturage ba Uganda, kuri uyu wa 4 Kamena 2021.
Yagize ati: “Iraswa rya Gen. Katumba Wamala ryakozwe n’abo nise ingurube ku wundi munsi, ryerekanye imikorere mibi ya polisi.”
Perezida Museveni yasobanuye ko yashyize camera ku muhanda, izo zikaba zikoreshwa na polisi. Yibaza impamvu ukoresha atamenyesheje bagenzi be kugira ngo birukankane abagizi ba nabi batararasa aba bantu.
Ati: “Camera nashyizeho zakoze umurimo wazo. Ni ukubera iki abazikoresha batamenyesheje abapolisi bari ku burinzi kugira ngo birukankane aba bantu?”
Si ubwa mbere Museveni anenze polisi y’igihugu kuko no mu gihe cyo kwiyamamariza umwanya w’Umukuru w’Igihugu mu mpera z’2020 yasimbuje bamwe mu bayobozi b’uru rwego, abashinja kunanirwa gukemura ikibazo cy’umutekano muke cyari kimaze iminsi kigaragara.
Ubwo yari amaze gusimbuza aba bapolisi, Museveni yavuze ko udashoboye aka kazi, akwiye kukavamo, akajya korora ihene.
Hari tariki ya 18 Ukuboza 2020 ubwo yari mu kiganiro n’abayobozi bakuru b’ishyaka NRM mu gace ka Kibaale. Yagize ati: “Igipolisi cyari cyarapfuye. Bakoze amakosa, bituma nkoramo impinduka. Ku bapolisi, nababwiye ko ntazongera kwihanganira amafuti. Uwo ari we wese utabasha kurwanirira abaturage, agomba gutaha, akaragira ihene.”
Gen. Katumba yarashwe tariki ya 1 Kamena 2021, arakomereka. Umukobwa we witwa Brenda Nantongo n’umushoferi wabo bari kumwe, bo barishwe.
Kurikira ibiganiro n’amavidewo binyura kuri Bwiza TV
