Perezida Nkurunziza Pierre yavutse ku wa 18 Ukuboza mu murwa mukuru wa Bujumbura mu Burundi, avuka kuri se witwaga Eustache Ngabisha wabaye mu nteko ishingamategeko mu 1965, akaba n’umuyobozi w’intara ebyiri.
Yize amashuri abanza mu ntara ya Ngozi ari na ho yakuriye, amashuri yisumbuye ayiga ku ishuri rya Athénée riherereye muri Gitega. Yize muri Kaminuza y’u Burundi, ahakura impamyabumenyi mu 1990.
Nkurunziza yarangije kaminuza ajya kwigisha muri Lycée de Muramvya mu 1991, mu 1992 ajya kwigisha muri Kaminuza y’u Burundi.
Mu 1993, iyi kaminuza yagabweho igitero cyaturutse ku makimbirane hagati y’ubwoko bw’Abahutu n’Abatutsi, Nkurunziza yararokotse mu gihe abagera kuri 200 bishwe. Aya makimbirane ni yo se Ngabisha yazize ubwo yicwaga mu 1972.
Amakuru ya Encyclopedia Britannica avuga ko Perezida Nkurunziza yinjiye mu mutwe wa FDD (Force pour Defence de Democratie) wari ishami ry’umutwe w’Abahutu bari mu buhungiro, CNDD ( Conseil National pour Defence de Democratie), ubu rikaba ari ryo shyaka abarizwamo, rikitwa CNDD-FDD.
Mu 1998, ubwo yari mu buhungiro, urukiko rwamukatiye igihano cy’urupfu ku bw’ibikorwa byo kwigomeka n’ibyaha by’intambara bivugwa ko byakozwe n’uyu mutwe wa CNDD-FDD
Hagati ya 1998 n’2000, CNDD-FDD ryigabyemo ibice bitandukanye maze Nkurunziza ayobora igice kimwe. Mu bubasha yari abonye, nk’uhagarariye CNDD-FDD yagiranye amasezerano y’amahoro na Perezida Ndayizeye mu 2003.
Muri aya masezerano, Perezida Nkurunziza yahawe ubudahangarwa bwatumye aba ‘ndakorwaho’ n’ubwo yari yakatiwe gupfa.
Ku ngoma ya Ndayizeye, Nkurunziza yabaye Minisitiri w’Imiyoborere myiza mu 2004.
Mu 2005, CNDD-FDD ni bwo yabaye ishyaka rya politiki ryemewe n’amategeko maze Pierre Nkurunziza arihagararira mu matora y’Umukuru w’Igihugu yegukanye ku wa 19 Kanama, arahira ku wa 25.
