Mu gihe amahanga akomeje guhata igitutu Leta y’u Burundi, ayisaba guhagarika ubwicanyi bukomeje kuhakorerwa n’ibindi byaha byibasira ikiremwamuntu, Perezida Nkurunziza we yavuze ko ubwo bwicanyi buhitana abo mu bwoko bwose (Abatutsi,Abahutu,…).
Kuri uyu wa Gatandatu tariki ya 24 Nzeli 2016, nibwo Perezida Nkurunziza yabanje gushima Imana yo mu ijuru ko imukunda igakunda n’igihugu cye by’umwihariko aboneraho no kugira icyo avuga kuri ubwo bwicanyi n’intsinzi ya CNDD FDD.
Yagize ati: “Imana ni nziza, Irakunda Uburundi, Irakunda Abarundi, Irakunda Abagumyabanga. Twame twibuka kuyishimira vy’umwihariko”.
Yakomeje agira ati: “Intsinzi ya CNDD FDD yo muri 2015, ni ikimenyetso c’ubwizigirwa budasanzwe Imana yatugiriye, ngo turongore u Burundi mu bihe bigoye nk’ibi”
Yakomeje ahamya ko n’ubwo bwose haba ubwicanyi, budakorerwa ab’ubwoko bumwe gusa, ati: “Abishwe bose ni abaturuka mu mashyaka yose”. Yaboneyeho kandi no guhita abacira umugani ugira uti: “Uja mw’ishamba utazi ugaca inkoni utazi”.
Yakomeje gushimangira kandi ko banezerewe by’umwihariko ishyaka CNDD FDD ryanarangije gushyiraho abayobozi bashya mu bice bitandukanye by’igihugu.
Perezida Nkurunziza yagize byinshi avuga ku matora yatsinze muri 2015, ko yafunguye benshi amaso, mu gihugu imbere ndetse n’amahanga.
Ati: “Amatora yo muri 2015 mu Burundi, yafunguye amaso benshi (des millions), mu Burundi, muri CNDD FDD, mu bihugu by’Abavandimwe b’Abanyafurika ndetse no ku isi yose”.
Nkurunziza yavuze ko hishwe abo mu bwoko bwose, mu gihe abatavuga rumwe n’ubutegetsi bwe bari bamaze iminsi batangaza ko ubu harimo kwicwa abasirikare EX FAB, bahoze barwanirira igihugu bo mu bwoko bw’Abatutsi.
Ibi kandi bikaza bisanga icyegeranyo cya Loni kivuga ko mu Burundi hashobora kuba jenoside kubera ubwicanyi bukomeje kuhakorerwa.
Nkurunziza akaba ahamya ko irondamoko,karere,miryango,… ryahozeho mu Burundi hakanicwa Ndadaye Melchior mu mwaka w’1993, waharaniraga Demokarasi.
Kanda hano ujye ubona amakuru yihuse kandi kugihe kuri Facebook no kuri twitter
Itangishatse Théoneste/Bwiza.com
