Perezida wa Repubulika ya Mozambique, Filipe Nyusi n’umufasha we Dr Isaura Nyusi bafashe icyemezo cyo kwishyira mu kato nyuma y’aho ibipimo byihuse (rapid test) byaragararije ko banduye icyorezo cya Covid-19.
Ibiro bya Perezida wa Mozambique mu itangazo byashyize hanze kuri uyu wa 3 Mutarama 2022 byavuze ko Nyusi n’umugore we bafashe iki cyemezo mu rwego rwo kubahiriza amabwiriza yashyizweho n’inzego z’ubuzima yo gukumira iki cyorezo.
Byagize biti: “Bijyanye n’amabwiriza y’ubuzima ariho n’ubwo nta bimenyetso, Perezida Nyusi n’umugore we bafashe icyemezo cyo kubahiriza ibwiriza ry’akato mu gihe bategereje igipimo kidasubirwaho cya PCR.”
Iki gipimo kigaragaje ko Perezida Nyusi yanduye iki cyorezo nyuma y’iminsi 3 agiriye uruzinduko mu mujyi wa Mueda mu Ntara ya Cabo Delgado, aho yahuye n’abahagarariye ingabo za Mozambique, iz’u Rwanda n’iziri mu butumwa bw’amahoro bw’umuryango wa Afurika y’amajyepfo, SAMIM.
