Perezida mushya wa Repubulika Yunze Ubumwe ya Tanzania, Samia Suluhu Hassan, kuri uyu wa 31 Werurwe 2021 yakoze impinduka zikomeye muri guverinoma.
Ni nyuma y’aho atangarije Visi Perezida w’igihugu, Dr Philip Mpango wari Minisitiri w’Imari n’Igenamigambi, tariki ya 30 Werurwe 2021.
Mu mpinduka Perezida Suluhu yakoze harimo gushyira Ambasaderi Liberata Mulamula ku nshingano ya Minisitiri w’Ububanyi n’Amahanga, amusimbuje Prof. Palamagamba Kabudi.
Ambasaderi Mulamula ubusanzwe yari umunyamabanga wa Leta muri iyi Minisiteri, akaba yarahawe iyi nshingano, nyuma yo guhagararira Tanzania muri Leta Zunze Ubumwe za Amerika.
Prof. Palamagamba yavanwe mu bubanyi n’amahanga, agirwa Minisitiri w’Ubutabera n’ibyerekeye Itegekonshinga rya Repubulika, asimbuye Mwigulu Lameck Nchemba.
Mwigulu Nchemba na we yagizwe Minisitiri y’Imari n’Igenamigambi asimbuye Visi Perezida mushya, Dr Philip Mpango.
Dr Bashiru Ally Kakurwa wagizwe Umunyamabanga Mukuru wa Leta tariki ya 26 Gashyantare 2021 (yari yasimbuye Amb. Eng. John Kijazi wari umaze gupfa), na we yasimbujwe Hussein Matanga.
Perezida Suluhu ukoze izi mpinduka yarahiriye kuyobora Tanzania tariki ya 19 Werurwe 2021, asimbuye Dr John Pombe Magufuli wishwe n’indwara y’umutima tariki ya 17 Werurwe.
Kurikira ibiganiro n’amavidewo binyura kuri Bwiza TV
