Perezida wa Ukraine aremeza ko Ingabo z’u Burusiya zimaze kwicirwa muri Ukraine zigera ku 40,000

Perezida wa Ukraine, Volodymyr Zelensky arashaka gukuraho ubugenzuzi bwa Kremlin asaba umuntu uwo ari we wese ufite aho ahurira n’u Burusiya gusangiza abandi ibyo avuga ko ari umubare wa nyawo w’abasirikare babwo bamaze kwicirwa mu ntambara.

Kuri uyu wa Kabiri ushize, mu ijambo yagejeje ku banyagihugu, Perezida Zelensky yavuze ko abasirikare bagera ku 40.000 b’u Burusiya bishwe kuva intambara yo muri Ukraine yatangira muri Gashyantare. Imibare nyayo ku bahitanwa n’intambara yaranzwe na poropaganda ku mpande zombi.

Ijambo rya Zelensky nk’uko tubikesha Newsweek, rije mu gihe ingabo za Ukraine ziri kugaba ibitero byo kugerageza kwisubiza ibice yambuwe yizera ko bizahindura imirongo y’intambara.

Mu magambo ye, Zelensky yagize ati: “Mu gihe cy’amezi ane, igihugu cy’u Burusiya nticyigeze giha abaturage bacyo amakuru ku bijyanye n’igihombo abasirikare bagira.” “Guceceka rwose. Nta kintu na kimwe cyatangajwe cyangwa ngo kivugwe mu biganiro byinshi ndetse na disikuru ku rwego rwa politiki n’igisirikare.”

Usibye ingabo z’u Burusiya zishwe, Zelensky yavuze ko “abandi ibihumbi icumi bakomeretse kandi bamugaye.” Yongeyeho ko niba abayobozi b’u Burusiya batazatangaza imibare y’abasirikare bishwe, “umuntu wese ugifite aho ahuriye n’u Burusiya cyangwa ufite uruhare ku makuru agomba kugeza uku kuri koroshye ku muntu wese ushoboka.”

Zelensky ntabwo yatanze ishingiro ry’imibare yatanze, mu gihe abandi bavuga ko umubare w’abasirikare b’u Burusiya bicirwa muri Ukraine ari muto.