Perezida wa Repubulika ya Ukraine, Volodymyr Zelensky yatangaje ko afite icyizere cy’uko intwaro abadepite bo muri Leta Zunze Ubumwe za Amerika (USA) baherutse kwemerera igihugu kuguriza ingabo ze, zizatuma babasha gutsinda iz’u Burusiya.
Tariki ya 28 Mata 2022 ni bwo aba badepite batoye ku bwinshi icyemezo cy’uko Leta ya USA yaguriza Ukraine intwaro binyuze muri gahunda yakoresheje guhera mu ntambara ya kabiri y’Isi yitwa ‘Lend-Lease’. Muri 427 batoye iki cyemezo, 417 baracyemeye, abandi 10 baracyanga.
Perezida Zelensky mu butumwa bwa videwo yatambukije ku munsi wakurikiyeho, yashimiye aba badepite na Perezida Joe Biden wa USA, agaragaza icyizere cy’uko umusaruro yiteze muri iyi gahunda ya ‘Lend-Lease’ ari nk’uwo yatanze mu ntambara ya kabiri y’Isi.
Uyu Mukuru w’Igihugu yagize ati: “Ndizera ko Lend-Lease izafasha Ukraine ndetse n’Isi yose yigenga bitsinda abaragwa b’intekerezo by’Abanazi badushojeho intambara. Iyi gahunda n’izindi zishyigikiye Ukraine ni ikimenyetso gifatika cy’uko ukwibohora kugishoboye kurwanya ubushotoranyi.”
Intwaro USA yahaye ibihugu muri gahunda ya Lend-Lease mu ntambara ya kabiri y’Isi yabaye hagati y’1939 n’1945, zabifashije gutsinda byoroshye u Budage bwari buyobowe n’umunyagitugu w’Umunazi, Adolf Hitler.
