Abatoza bo muri shampiyona y’Abongereza, biravugwa ko bari guhamagarana ubutitsa mu rwego rwo gucura umugambi w’uko babasha guhagarika rutahizamu Erling Haaland wamaze kubakura imitima.
Uyu munya-Norvège ukinira Manchester City kuri ubu amaze gutsinda ibitego icyenda mu mikino itanu ya Premier league amaze gukina, ibyakuye imitima abatoza bose muri shampiyona y’Abongereza.
Haaland aheruka gutsinda ibitego bitatu (Hat-trick) mu mukino w’umunsi wa gatanu wa shampiyona Manchester City iheruka kunyagiramo Nottingham Forest ibitego 6-0, iba Hat-trick ya kabiri atsinze muri uyu mwaka w’imikino kuko yanaherukaga gutsinda ibitego bitatu Man City itsinda Crystal Palace ibitego 4-2.
Ibitego icyenda byose amaze gutsinda yabitsinze mu kwezi gushize kwa Kanama, ibyatumye yesa umuhigo wo kuba umukinnyi watsinze ibitego byinshi muri Kanama mu mateka ya Premier league.
Haaland umaze umaze gukora ku mupira incuro 101, muri uyu mwaka w’imikino kandi amaze kwinjiza ibitego byinshi kurusha amakipe 15 muri 20 ari gukina Premier league.
Kubera ibitangaza uyu mukinnyi ari gukora, bivugwa ko abatoza bo muri Premier league batangiye kuganira ku buryo bamuhagarika nk’uko The Sun yabyanditse.
Iki kinyamakuru cyavuze ko hari umutoza wabwiye bagenzi be ko Haaland ari “ikivejuru gifite imbaraga, kirekire kandi cyihuta cyane” kuruta ikindi kintu yaba yarigeze kubona.
Uyu mutoza na bagenzi be bavuze ko hakenewe kugira igikorwa mu buryo bwihuse, n’ubwo hari benshi mu batoza bafite ubwoba bwinshi bw’uko kumuhagarika bizagorana.
Kugeza ubu ikipe rukumbi muri Premier league yashoboye kubuza Haaland kuyitsinda igitego ni AFC Bournemouth, gusa yatanze umupira wavuyemo igitego muri 4-0 Manchester City yayinyagiye.
Kuba Haaland ateye ubwoba imbere y’izamu si bishya kuri we, kuko nka Borussia Dortmund Man City yamuguzemo yasize ayitsindiye ibitego 86 mu mikino 89 yari amaze kuyikinira.
Ni na ko bimeze muri Red bull Salzburg yo muri Autriche yahoze akinira, kuko na yo yayitsindiye ibitego 29 mu mikino 27 yari amaze kuyikinira.
