Perezida w’u Burusiya, Vladimir Putin, kuri uyu wa 24 Ukwakira yahaye ubwenegihugu Dr Butore Joseph wabaye Visi Perezida wa Repubulika y’u Burundi kuva mu mwaka w’2015 kugeza mu 2020 ubwo Evariste Ndayishimiye yajyaga ku butegetsi.
Dr Butore yahawe ubwenegihugu hamwe n’abandi babiri barimo umunyamakuru w’ikinyamakuru RT cyegamiye ku butegetsi bw’u Burusiya, Rory Suchet ukomoka mu Bwongereza ndetse n’umunyamakuru w’ibyegeranyo ukomoka muri Guatemala, Rojas Castillo Pablo Estuardo.
Ikinyamakuru Sputnik gisobanura ko Dr Butore wize mu Burusiya ahawe ubwenegihugu bitewe n’umubano wihariye yagiranye n’iki gihugu kuva mu 2013. Ubusanzwe anafite umugore w’Umurusiyakazi.
Dr Butore yavukiye mu ntara ya Cibitoke iri mu majyaruguru y’u Burundi muri Mata 1969. Yakoze indi mirimo irimo uw’ubudepite ndetse aba na Minisitiri ushinzwe uburezi n’ubushakashatsi kuva mu 2013 kugeza mu 2015 ubwo yagirwaga Visi Perezida.
