Inteko Ishinga Amategeko ya Afurika y’Epfo, yaraye itoreye Cyril Ramaphosa wari usanzwe ari Perezida w’iki gihugu gukomeza kukiyobora muri manda ye ya kabiri.
Ramaphosa yatowe nyuma y’uko ishyaka rye rya ANC ryaherukaga kwihuza n’andi mashyaka batavugaga rumwe, bijyanye n’uko ryari ryabuze ubwiganze mu matora y’abagize Inteko Ishinga Amategeko yabaye muri uku kwezi.
Amashyaka ANC yihuje na yo arimo irya Democratic Alliance (DA) n’andi mato.
Perezida Ramaphosa nyuma yo kwegukana intsinzi yashimagije ihuriro ry’amashyaka amushyigikiye, agaragaza ko abamutoye bitezeho abayobozi “gukora no gukorera hamwe ku bw’inyungu ya buri muturage wacu w’igihugu cyacu”.
Ramaphosa yari asanzwe ari Perezida wa Afurika y’Epfo kuva muri 2018, nyuma yo gusimbura ku butegetsi Jacob Zuma yahoze abereye Visi-Perezida.
Uyu mugabo nyuma yo kongera gutorwa byitezwe ko agomba gushyiraho abagize Guverinoma igomba kugaragaramo abo mu ishyaka DA ryamufashije kubona intsinzi.
Iri shyaka ryandi ryemerewe umwanya wa Visi-Perezida w’Inteko Ishinga Amategeko, mu gihe umuyobozi wayo agomba kuva muri ANC.
ANC yihuje n’abarimo DA nyuma yo gutandukana n’andi mashyaka bakoranaga, ibyazamuye impaka nyinshi mu banya-Afurika y’Epfo.
Icyakora amakusanyabitekerezo yagiye akorwa yerekana ko umubare munini w’abaturage ba Afurika y’Epfo bifuriza ihuriro rishya riyoboye igihugu gutsinda.
Mu busanzwe kuva mu 1994 ANC yagiraga amajwi ari hejuru ya 50% mu matora, gusa abashyigikiye iri shyaka bagiye bagabanuka cyane kubera kutishimira ibibazo bya ruswa, ubwicanyi n’ubushomeri byugarije Afurika y’Epfo.
Mu bo Ramaphosa yatsinze harimo umunyapolitiki Julius Malema ukuriye ishyaka Economic Freedom Fighters.
Uyu mugabo wahoze muri ANC mbere yo kwitandukanya na yo yavuze ko ishyaka rye ryemera ibyavuye mu matora ndetse rikaba rinubaha ijwi ry’abaturage ba Afurika y’Epfo.
Icyakora yavuze ko ishyaka rye ritemera “ugushyingiranwa” kwa ANC na DA, agaragaza ko ukwihuza kw’aya mashyaka kugamije “gusigasira ubutegetsi bwa ba nyamuke b’abazungu kuruta ubukungu bw’igihugu, ndetse n’ibikenerwa ngo igihugu kigere ku musaruro”.
