Ikipe ya Rayon Sports irimo guhangana n’ikibazo cy’ubukungu gikomeye aho bivugwa ko abakinnyi n’abakozi bayo baberewemo imyenda irenga miliyoni 70 z’amafaranga y’u Rwanda, arimo imishahara n’amafaranga yo kuzana abakinnyi.
Mu kiganiro n’itangazamakuru, Perezida wa Rayon Sports, Thaddée Twagirayezu, yemeye ko iki kibazo gihari anavuga ko cyatangiye mu bihe bya mbere ku buyobozi bwabanjirije ubwe.
Yagize ati: “Tumaze amezi abiri gusa turi hano, ariko turi gukemura ibibazo byariho kuva kera.”
Rayon Sports iherutse kugura abakinnyi bashya bagombaga kwishyurwa miliyoni 138 z’amafaranga y’u Rwanda. Kugeza ubu, iyi kipe imaze kwishyura miliyoni 68 ikaba iri gushaka uburyo bwo kwishyura amafaranga asigaye.
Muri iyi minsi y’igura n’igurisha, Rayon Sports yaguze Umunya-Cameroun Innocent Assana Nah kandi bivugwa ko bari mu biganiro na Raymond Lolendi Ntudyimara wo muri Tanzania na Malick Ntamba Musikabo wo muri Repubulika Iharanira Demokarasi ya Congo (DRC).
Nubwo ihanganye n’iki kibazo cy’imari, Rayon Sports ni yo iyoboye urutonde rwa Shampiyona y’u Rwanda, ifite amanota 36, irusha APR FC ya kabiri amanota atanu.
