Ikipe ya Rayon Sports kuri uyu wa Gatanu, yatsinze Musanze FC igitego 1-0 mu mukino wa gicuti amakipe yombi yari yahuriyemo.
Ni umukino amakipe yombi yari yahuriyemo kuri Stade Ubworoherane, yitegura shampiyona y’icyiciro cya mbere igomba gutangira mu kwezi k’Ukwakira.
Igice cya mbere cy’uyu mukino warimo ishyaka ku mpande zombi cyarangiye amakipe yombi anganya 0-0, n’ubwo Rayon Sports yari yagiye ihusha uburyo butandukanye.
Nko ku munota wa 5 umunye-Mali Sanago Soulaiman uri mu bakinnyi bari mu igeragezwa yahinduye umupira mwiza imbere y’izamu, gusa mugenzi we Mpongo Sadam Blaise ntiyashobora kuwutereka mu nshundura.
Uyu rutahizamu yaje gusimburwa n’umunya-Nigeria Chukwuwudi Samuel ku munota wa 33, riba isimbuza rya kabiri Rayon Sports yari ikoze kuko Nishimwe Blaise yari yavuye mu kibuga yavunitse agasimburwa na Mugisha François ‘Master’.
Rayon Sports yabonye ubundi buryo ku ishoti rikomeye Niyigena yarekuye, gusa umupira ukanyura hejuru y’izamu rya Musanze FC ndetse n’uwa Master wanyuze hanze gato y’izamu ku munota wa 41.
Rayon Sports yabonye igitego rukumbi cyabonetse muri uyu mukino ku munota wa 49 ibifashijwemo n’umunya-CamĂ©roun Esouma Willy Onana ukomeje kwitwara neza.
Byari nyuma y’uko Rayon Sports yari imaze gukora impinduka igaha umwanya Bashunga Abouba na Muvandimwe JMV binjiye basimbura Hakizimana Adolphe na Mujyanama Fidèle.
