Ikipe ya Rayon Sports yegukanye amanota atatu y’umunsi wa 10 wa shampiyona nyuma yo kunyagira Mukura VS ibitego 4-1.
Iyi kipe ikunzwe kurusha izindi yari yakiriye Mukura VS bakunze guhangana, mu mukino w’umunsi wa 10 wa shampiyona wabereye kuri Kigali Pele Stadium.
Igice cya mbere cyawo cyarangiye amakipe yombi anganya igitego 1-1.
Murera ni yo yabanje gufungura amazamu ibifashijwemo na Muhire Kevin watsindiye mu kavuyo igitego cyo ku munota wa munani w’umukino, mbere y’uko Ishimwe Elie Tatu atsindira Mukura VS igitego cy’akataraboneka ku munota wa 33 w’umukino.
Amakipe yombi yagiye kuruhuka anganya igitego 1-1.
Rayon Sports ibifashijwemo n’umurindi w’abafana bayo yashyize igitutu cyinshi kuri Mukura VS, birangira iyibonyemo ibindi bitego bitatu.
Byasabye umunota wa 63 w’umukino ngo iyi kipe iyobore umukino biciye kuri Aruna Madjaliwa, mbere y’uko HĂ©ritier Luvumbu atsinda igitego cya gatatu kuri penaliti ya Panenka yo ku munota wa 82.
Agashinguracumu kaje mu minota y’inyongera gatsinzwe na Mvuyekure Emmanuel ‘Manu’.
Mu yindi mikino: APR FC ibifashijwemo na Victor Mbaoma na Kwitonda Alain Bacca yagiye gutsindira Muhazi United i Ngoma ibitego 2-1.
Musanze FC ibifashijwemo na Muhammed Suley yatsinze Kiyovu Sports igitego 1-0, na ho Marines FC itsinda Amagaju FC igitego 1-0.
Umunsi wa 10 wasize Musanze FC ikiyoboye shampiyona n’amanota 23, irusha abiri APR FC ya kabiri n’ubwo iyi kipe y’Ingabo z’Igihugu ifite umukino w’ikirarane izahuriramo na Sunrise FC.
Police FC iri ku mwanya wa gatatu n’amanota 19, ikarusha Rayon Sports bafitanye umukino w’ikirarane amanota atatu.
