Abasirikare bakuru 41 (abajenerali mirongo itatu na batanu n’abakoloneli batandatu) bahamagajwe mu minsi yashize n’ubugenzuzi bukuru bw’ingabo za DRC (FARDC) mu rwego rwo gukora iperereza ku gutsindwa kw’ingabo imbere y’inyeshyamba za AFC-M23 mu burasirazuba bw’igihugu.
Kuri uyu wa Mbere, itariki ya 25 Kanama 2025, Umuvugizi wa FARDC, General Major Sylvain Ekenge, yatangaje ko ubu ari uburyo busanzwe buri mu nshingano z’Ubugenzuzi Bukuru bw’Ingabo.
Ibi bireba abasirikare bakuru bose bari bafite inshingano ku rugamba kuva Umujyi wa Bunagana wo ku mupaka wigarurirwa n’inyeshyamba za M23 kuva muri Kamena 2022.
Ni abari mu buyobozi bw’ingabo kuva mu buyobozi bukuru (état-major) bwa FARDC kugeza kuri ba komanda b’ibikorwa bya Sokola 2 muri Kivu y’Amajyaruguru, uhereye ku buyobozi bw’ingabo zirwanira ku butaka, ingabo zirwanira mu mazi, ingabo zirwanira mu kirere, Akarere ka gatatu ka gisirikare, ndetse n’ibiro bya guverineri w’umusirikare wa Kivu y’Amajyaruguru.
Nk’uko Gen. Major Ekenge abitangaza, ngo ikigamijwe ni ugukomeza iperereza no “kubona ibisobanuro ku ruhare rwa buri ruhande muri iki kibazo cya gisirikare gifite ingaruka zikomeye ku bijyanye n’ingamba n’umutekano.”
Umuvugizi wa FARDC avuga ko ku kijyanye na ba ofisiye ubu bafunzwe, Ubugenzuzi Bukuru bufatanya n’ubushinjacyaha bwa Gisirikare kugira ngo byoroshye kumva ibisobanuro byabo muri gereza zitandukanye.
