Ingabo za Repubulika Iharanira Demokarasi ya Congo (FARDC) ziratangaza ko zivuganye abarwanyi 20 b’Umutwe wa M23 zinafata mpiri abandi 25 barimo abanyarwanda 15. Ni mu mirwano yabahanganishije mu minsi ishize guhera ku ya 27 Mutarama 2017.
Nk’uko bitangazwa na Komanda ushinzwe zone ya gatatu y’Ingabo za Congo, General Léon Mushale, ngo aba bafashwe mpiri bashyikirijwe inzego za gisivile i Goma kuri uyu wa Gatatu tariki ya 1 Werurwe 2017.
[xyz-ihs snippet=”google-pub”]
Gen. Léon Mushale aganira na Radio Okapi, avuga ko ibikorwa byo guhiga abarwanyi b’Umutwe wa M23 byabereye mu duce tubiri ati’’ Igice cya mbere ni hagati y’umusozi wa Mikeno n’uwa Kalisimbi, naho igice cya Kabiri ni ku mbiri za Uganda n’umusozi wa Sabyinyo. Abarwanyi 20 ba M23 barishwe naho abandi 25 bafatwa mpiri.Twagize n’amahirwe yo gufata ibikoresho byinshi bitandukanye’’. Aba 25 bafashwe mpiri barimo abanyarwada 15 n’abayekongo icumi nk’uko Radio Okapi ikomeza ibivuga.
Gen.Mushale akomeza avuga ko mu gihe cy’imirwano abandi barwanyi ba M23 bahungiye muri Uganda no mu Rwanda. Avuga ko bigiteye inkeke kuko aba barwanyi bafite ibirindiro mu bihugu by’ibituranyi ariko ngo FARDC ikaba itazongera kubemerera ko hari ikindi gitero bagaba ku butaka bwa Congo.
Agira ati’’ Ubu mvuga , M23 yahungiye muri Uganda no mu Rwanda. Ibi bihugu byemeje ko aba barwanyi koko babihungiyemo.Turabasaba kuba maso kuko umwanzi wahunze si umwanzi watsinzwe, ni umwanzi ufite kongera kwisuganya kugira ngo agaruke.Gusa birasaba ko umunsi bazagaruka bazadusanga mu nzira yabo maze bagatsindwa mu gihe gito gishoboka’’.
[xyz-ihs snippet=”google-pub”]
Yongera ho ko yizeye ko igihugu cy’u Rwanda na Uganda bizashyikiriza Leta ya Congo abarwanyi bose ba M23 babihungiyemo.
Kanda hano ujye ubona amakuru yihuse kandi kugihe kuri Facebook no kuri twitter
Gabriel Habineza /Bwiza.com
