Abapolisi 350 bari mu kazi boherejwemo guhera mu Ukuboza ko gutuma amatora aba mu ituze muri Uvitra ho muri Kivu y’Amajyepfo, kuri uyu wa Mbere ushize batangiye imyigaragambyo basaba guhabwa ibirarane by’umushahara wabo w’amezi atatu bamaze batabona.
Kuva kuwa Mbere ninjoro kugeza mu gitondo cyo kuri uyu wa Kabiri ushize, itariki 19 Gashyantare, abo bapolisi bari bafunze umuhanda mukuru uri ahitwa Rugenge bashaka kumvikanisha ijwi ryabo.
Abari mu myigaragambyo bagira bati: “ Kuva twagera aha, twatekanishije amatora tudahembwa. Abandi bagenzi bacu bari mu zindi ntara, nka Kinshasa na Lubumbashi, bamaze guhembwa. None kubera iki twebwe? Guverinoma yaradutaye cyangwa? ”
Aba bapolisi nk’uko iyi nkuru dukesha Radio Okapi ivuga, bavuga ko baryama hasi nta nzitiramibu, bikaba byabatera indwara. Bakaba rero basaba abayobozi kugira icyo bakora kuri iki kibazo cyabo.
Abakuriye ingabo n’abapolisi muri Uvira biravugwa ko bageze ahaberaga imyigaragambyo, bagasaba abapolisi gutuza, bakabizeza ko ikibazo cyabo gikemurwa vuba.
Amakuru akavuga ko ituze ryaje kugaruka urujya n’uruza rukongera gusubukurwa nyuma yo kuvugana n’aba bayobozi babo.
