Abasirikare babiri mu Ngabo za Repubulika ya Demokarasi ya Congo “FARDC” bitabye urukiko rwa gisirikare rwa Ituri kuri uyu wa Gatanu, itariki 25 Kamena, ahatangijwe urubanza bakurikiranwemo icyaha cyo gutakaza intwaro zabo.
Umugenzuzi mukuru wa gisirikare, Colonel Joseph Makelele, avuga ko aba basirikare barimo liyetona-koloneli hamwe na Adjudant bakurikiranyweho kubura intwaro.
Avugana n’itangazamakuru Col. Makelele yagize ati “Ni umuliyetona-koloneli n’umu-adjudant. Ni ukubera kubura imbunda byatumye bazanwa hano mu rukiko. Twashakaga guhagarika ubwo bucuruzi butemewe”.
Nk’uko iyi nkuru dukesha 7sur7.cd ivuga, ngo aba basirikare bari baroherejwe gukorera ahitwa Bogoro, agace gaherereye mu birometero nka 25 mu majyepfo y’uburasirazuba bwa Bunia, babuze imbunda zigera 5 ku itariki 12 Ukwakira 2020. Mbere yaho, izindi mbunda 25 zari zaburiwe irengero na none muri uwo mutwe babarizwamo.
Muri urwo rubanza rwa mbere rw’ubwo bwoko rwateguwe n’urukiko rwa gisirikare rwa Ituri kuva rwashingwa mu byumweru bikeya bishize, ubucamanza bwa gisirikare burashaka kurwanya iri bura ry’intwaro birangira ziruhukiye mu maboko y’imitwe yitwaje intwaro.
Ubwo aheruka guca mu Ntara ya Ituri, Perezida Felix Tshisekedi yari yamaganye ayo manyanga akorwa n’abasirikare n’abashinzwe umutekano.
