Abasirikare bane ba FARDC ndetse n’inyeshyamba eshatu nibo baguye mu mirwano iherutse kubahuza mu Ntara ya Kivu y’Amajyepfo nk’uko amakuru yagiye ahagaragara kuri uyu wa Kane avuga.
Imirwano hagati y’ingabo za Congo n’inyeshyamba z’umutwe wa Raia Mutomboki yabaye mu rukerera rwo kuri uyu wa Gatatu ushize ibera muri Teritwari ya Kabare, mu birometero nka 40 mu burengerazuba bw’Umujyi wa Bukavu nk’uko umuvugizi w’igisirikare muri ako gace, Capt. Dieudonné Kajibwami yabitangarije AFP .
Capt. Kajibwami yavuze ko abasirikare bane ba leta bishwe abandi batatu bagakomereka, naho inyeshyamba eshatu aba ari zo zicwa. Yongeyeho ko umutuzo wagarutse muri aka gace ariko igisirikare gikomeje gukurikirana abagabye iki gitero ku birindiro byabo biri ahitwa Ihembe.
Umutwe wa Raia Mutomboki bisobanura umuturage wariye karungu ugenekereje mu Kinyarwanda, wagaragaye mu 2005 ahitwa Shabunda nk’umutwe ugamije kwirwanaho wirinda umutwe wa FDLR w’inyeshyamba z’Abanyarwanda.
Kimwe n’indi mitwe yitwaje ibirwanisho ikorera mu burasirazuba bwa Congo, uyu mutwe wa Raia Mutomboki biravugwa ko wataye ibiranga umutwe uharanira inyungu za politiki ahubwo uhinduka nk’umutwe w’abagizi ba nabi nk’uko Radio Okapi dukesha iyi nkuru isoza ivuga.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com
