Mu mpera y’icyumweru gishize abantu batatu bishwe baciwe imitwe mu ntara ya Kasai iri hagati muri Repubulika ya Demokarasi ya Congo, ubwo bamamazaga umukandida-perezida w’urugaga rw’amashyaka ari ku butegetsi nk’uko byatangajwe na AFP.
Abo mu miryango ya ba nyakwigendera ndetse n’abategetsi bo mu ishyaka ry’uwo mukandida w’ishyaka PPRD nibo babitangarije ibi biro ntaramakuru by’Abafaransa.
Umuhungu w’umwe muri ba nyakwigendera yabwiye AFP ko bari bambaye imipira igaragaza mu maso hasa nk’aha Emmanuel Ramazani Shadary, umukandida-perezida w’urugaga rw’amashyaka ari ku butegetsi muri Congo.
Hagati aho, ibikorwa byo kwiyamamaza ku bakandida-perezida bikaba byamaze gutangira ku mugaragaro.
Amatora y’umukuru w’igihugu muri Repubulika iharanira Demokarasi ya Congo ateganyijwe kuwa 23 Ukuboza 2018. Aya matora akaba agiye kuba nyuma yo kwegezwa inyuma inshuro nyinshi kuva mu 2016 Perezida Kabila yasoza manda yemerewe n’itegeko nshinga.
