Human Rights Watch yatangaje kuri uyu wa Kabiri ko ifite raporo yizewe ivuga ko inzego z’umutekano za Repubulika iharanira Demokarasi ya Congo zimaze kwica abaturage 37 mu minsi 2 y’imyigaragambyo ikaze yaranzwe n’ubugizi bwa nabi isaba perezida Kabila kurekura ubutegetsi.
Kuri uyu wa Mbere ushize, itariki 19 Nzeri nibwo mu mihanda yo mu murwa mukuru wa Congo, Kinshasa, habyukiye imyigaragambyo ikomeye y’abatavuga rumwe n’ubutegetsi basaba kubahiriza ingengabihe y’amatora bbyari biteganyijwe ko azaba muri uyu mwaka mu mezi atageze kuri 3 ari imbere.
Guverinoma ya Congo ariko yo yakunze kugaragaza ko hari ibibazo bitarakemuka mu gutegura amatora ikavuga ko amatora ashobora kutazaba nk’uko byari biteganyijwe, abatavuga rumwe n’ubutegetsi bakavuga ko ari uburyo bwo gukwepa amatora kugirango perezida Kabila agume ku butegetsi.
Inkuru dukesha reuters ikaba ivuga ko Ida Sawyer, umushakashatsi wa HRW kuri Afurika, yavuze ko abantu 20 bishwe kuwa Mbere, mu gihe abagera kuri 17 bishwe mu ijoro ndetse no kuri uyu wa Kabiri ushize.
Ibi ariko yabivuze mu gihe minisitiri w’umutekano, Evariste Boshab, we yatangaje ko abantu baguye muri iyi myigaragambyo ari 17 barimo abapolisi batatu.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com
