Minisitiri ushinzwe kwegereza abaturage ubuyobozi n’amavugurura y’inzego wa Repubulika iharanira Demokarasi ya Congo, Azarias Ruberwa, kuri uyu wa Gatandatu yagejejwe muri Afurika y’Epfo agiye kwivuza nyuma yo gufatwa na Covid-19 nk’uko byatangajwe n’ibiro bye.
Azarias Ruberwa Manywa yajyanywe mu ndege y’imbangukiragutabara, igikorwa cyabashije gukorwa nyuma y’uruhushya rw’abayobozi ba Afurika y’Epfo, Guverinoma ya Congo na Perezidansi.
Iyi nkuru dukesha urubuga rwa Actualite.cd iravuga ko hari hashize iminsi Ruberwa atitabira imirimo y’inama z’abaminisitiri zitegurwa na Minisitiri w’Intebe, Sylvestre Ilunga Ilunkamba.
Kuva icyorezo cya Covid-19 cyagaragara muri Congo kuwa 10 Werurwe 2020, abamaze kucyandura bagera ku 16,762. Muri rusange, abantu 573 kimaze kubahitana mu gihe abagera ku 13,982 bagikize.
