Imiryango itanu iharanira uburenganzira bwa muntu iravuga ko itewe impungenge n’umubare w’ingabo ukomeje kwiyongera mu cyahoze ari intara ya Katanga. Izi ngabo zatangiye kongerwa muri aka gace kuva ku itariki ya 1 Mata 2016. Izi ngabo zikaba zirimo kuzana n’intwaro ziremereye zirimo, ibimodoka by’iminyururu bya gisirikare ( Char de combat), ibimodoka bya burende, amasanduku y’amasasu.
Mu ibaruwa ifunguye igenewe minisitiri w’ingabo yanditswe ku itariki ya 5 Mata 2016 n’iyi miryango , yasabye leta gutanga ibisobanuro birambuye ku mubare munini w’ingabo n’ibikoresho biremereye bya gisirikare biri kuboneka mu duce twa Lubumbashi, Kamina, Kolwezi na Kalemie.
By’umwihariko muri komini Kenya mu mujyi wa Lubumbashi habonetse ibimodoka by’iminyururu bya gisirikare 60 nk’uko byemezwa n’iyi miryango.
Amakuru aturuka muri Kongo Kinshasa avuga ko izi ngabo n’ibikoresho bya gisirikare biza bwa mbere byabanje Lubumbashi ibindi binyura Kolwezi aha hose hakaba harofashishijwe inzira ya gari ya moshi.
Imiryango ya ACIDH, Asadho, CDH, Justicia ASBL na IRDH yemeza aya makuru binyuze mu ibaruwa yandikiye Minisiteri y’ingabo.
By’umwihariko Justicia Asbl ivuga ko kureka ibitwaro biremereye bigatembera mu gace katarangwamo intambara ari ibimenyetso by’umutekano muke uboneka mu gace.
Mu butumwa bwatanzwe na Televiziyo ya Lubumbashi, umukuru w’ingabo za batayo 22 General Philemon Yav yabwiye abaturage ba Lubumbashi ko badakwiye kugira ubwoba.
Avuga ko kuba ingabo ingabo zisukiranya ku bwinshi mu gace ari uburyo bwo kurengera agace ndetse no kuzongerera ubushobozi.
Kanda hano ujye ubona amakuru yihuse kandi kugihe kuri Facebook no kuri twitter
Alphonse Munyankindi / Bwiza.com
