Mu ijoro ryo ku wa Gatandatu tariki ya 14 Kamena rishyira ku Cyumweru tariki ya 15 Kamena, abantu 318 biciwe muri Repubulika Iharanira Demokarasi ya Congo, nyuma y’igitero bagabweho n’umwe mu mitwe y’inyeshyamba ikorera muri iki gihugu.
Amakuru y’ubu bwicanyi yatangajwe na Perezida w’Inteko Ishinga Amategeko ya RDC, Vital Kamerhe, ubwo ejo ku Cyumweru yasabaga abadepite bagenzi be gufata munota wo kunamira abishwe.
Kamerhe yavuze ko buriya bwicanyi bwabereye ahitwa Moba, mu ntara ya Tanganyika.
Yagize ati: “I Moba hari umukuru w’umutwe witwara gisirikare…yatuye umujinya abaturage, mu ijoro ryacyeye twabonye abantu 318 bishwe hanyuma imidugudu ihungamo abaturage. Ni amakuba mu Nteko Ishinga Amategeko tudashobora kurenza ingohe.”
Kamerhe ntiyigeze asobanura birambuye umutwe witwara gisirikare wishe bariya bantu, gusa yasobanuye ko ubwicanyi bwabakorewe bwakurikiye uruzinduko Minisitiri w’Ingabo za RDC aheruka kugirira muri Tanganyika, agatunga agatoki imwe mu mitwe ikorera muri iriya ntara.
