Umuryango utegamiye kuri leta uharanira inyungu z’abanyamakuru urasaba ubuyobozi bwa Repubulika Iharanira Demukarasi ya Congo gufata ingamba zihuse ku ihohoterwa rikorerwa abanyamakuru rimaze kuba akamenyero.
Mu nyandiko uyu muryango wa Journaliste En Danger (JED) wanditse uvuga ko iri hohoterwa ryisubira ari nayo mpamvu usaba leta kurihagarika.
Uvuga ko mu byumweru bibiri, abanyamakuru nibura 6 ari bo bagabweho ibitero mu murwa mukuru wa Kinshasa no mu ntara, abandi barafungwa. Uyu muryango watanze urutonde rwa bamwe muri bo n’ukuntu byagenze.
Muri bo wavuzemo Simon Bofunga, umuyobozi w’ikinyamakuru Congo Nouveau wafungiwe mu biro by’urukiko rw’ubujurire rwa Kinshasa kuri uyu wa 21 Kanama, Raim Mayama, umunyamakuru wa Masolo ya Congo na we watawe muri yombi ku wa 20 Kanama ku itegeko rya Kambaj uri mu bakomeye mu bucukuzi bw’amabuye y’agaciro, Serge Sindani ukorera Kis24 wakubiswe n’abitwaje intwaro ku wa 18.
Harimo kandi na Michel Tshiyoyo, umuyobozi wa Radio Sozer wafunzwe ku wa 14 Kanama, ku itegeko rya Guverineri wa Kasaà ¯ Central, Martin Kabuya umushinja kubiba urwango no kwibasira ubuyobozi bw’intara.
Uyu muryango ubona ibi bikorwa bitubaha ihame ry’ubwisanzure bw’itangazamakuru muri iki gihugu.
Â
Â
