Igisirikare cya Repubulika Iharanira Demokarasi ya Congo (FARDC) gitangaza ko cyafashe umwana utagejeje ku myaka 18 w’umunyarwanda, wabarizwaga mu nyeshyamba za ADF, zikomoka muri Uganda zikaba zikora ibikorwa bya kinyeshyamba muri Congo.
Umuvugizi w’igisirikare cya Congo, Lt Jules Ngongo avuga ko uyu mwana yari mu nyeshyamba za ADF, akaba yitwa Nishobo Omari. Ni umunyarwanda w’imyaka 13 y’amavuko, yafashwe n’igisirikare ku bw’amakuru cyari gihawe n’abaturage.
Ikinyamakuru Politicocd, gitangaza ko ari abaturage bahaye amakuru igisirikare cya Leta ko hari umutwe w’inyeshyamba uri mu gace uyu mwana yafatiwemo ka Boga, kari mu bilometero 120 uvuye mu mujyi wa Bunia, Intara ya Ituri.
Lt Ngongo ati ” Hari hashize icyumweru abaturage bagaragaza ko hari inyeshyamba zicyekwa kuba ADF, ingabo zoherejwe muri zone zifata uwo mwana ubwo zakozanyagaho”.
Yakomeje avuga ” Gen. Chaviri Amuli, ushinzwe ibitero muri Ituri arashima urahare rw’abaturage, akabasaba kongera ubushake bwo gukunda igihugu bahanahana amakuru n’ingabo za Leta kugira ngo umwanzi ahashywe”.
Kuva mu kwezi kwa Munani, izi nyeshyamba zicyekwa kuba ADF zikomeje kugaragara muri aka gace ka Boga, Teritwari ya Urumu, izi nyeshyamba zikaba zari zizwi cyane muri Teritwari ya Beni.
Â
Â
Â
Â
