Umwe mu baturage bo muri Repubulika Iharanira Demokarasi ya Congo, bigaragambyaga kubera umutekano muke, yafashwe n’isasu rya Polisi yari irashe mu kivunge, bimuviramo kwitaba Imana.
Ni imyigaragambyo yabaye ku wa Mbere tariki ya 19 Kanama 2019, i Oicha, umwe witwa Katembo Fikir w’imyaka 25, warashwe yaje gupfira mu bitaro bikuru bya Oicha.
Nk’uko bitangazwa n’ikinyamakuru Actualitecd, ngo imyigaragambyo yatangiye mu gitondo cyo kuri uyu wa Mbere nyuma y’urupfu rw’abantu batatu barimo umusirikare bishwe ku Cyumweru tariki ya 18 Kanama n’inyeshyamba za ADF zikomoka muri Uganda.
Abaturage bababajwe n’urupfu rw’aba baturage batatu bucya bigaba mu mihanda. Ubwo Polisi yageragezaga guhosha iyo myigaragambyo ngo nibwo yarashe mu kivunge bityo uyu musore w’imyaka 25 akomeretswa n’isasu, agejejwe mu bitaro arapfa.
