Mu ijoro ryo ku itariki ya 19 Gicurasi 2024, itsinda ry’abakomando bipfutse mu maso binjiye mu ngoro y’umukuru w’igihugu cya Repubulika ya Demokarasi ya Congo, bashaka kumuhirika, nyuma yo gutera urugo rwa Perezida w’inteko ishinga amategeko y’icyo gihe, Vital Kamerhe.
Ku ikubitiro, abanyamahanga batandatu bari mu bantu bafashwe bashinjwa kugira uruhare muri uwo mugambi wo gushaka guhirika ubutegetsi.
Umwaka ushize Abanyamerika batatu boherejwe gufungirwa iwabo, kandi biteganijwe ko urubanza rwabo ruzatangira muri Amerika muri Mata.
Hagati aho kandi, u Bubiligi bwahawe umwenegihugu wabwo, Jean-Jacques Wondo, Umubiligi ukomoka muri Kongo.
Ni muri urwo rwego, Umwongereza, Yusuf Ezangi, ukomoka muri Repubulika ya Demokarasi ya Congo, na we yoherejwe mu Bwongereza nk’uko inkuru dukesha RFI ivuga.
Ku wa Kabiri, itariki ya 31 Werurwe, yakuwe aho yari afungiwe, bitegetswe na Perezidansi ya Congo.
Kugeza mu gicuku cyo kuri uyu wa Kabiri ushize, biravugwa ko uyu mugabo uvugwa ko yari nomero ya kabiri mu itsinda ryafashe ingoro ya Perezida wa Repubulika ya Demokarasi ya Congo muri Gicurasi 2024, yari ategereza ko indege imujyana mu Bwongereza igera ku Kibuga cy’Indege Mpuzamahanga cya Ndjili.
Iki gikorwa, nk’uko abamwunganira babivuga, cyasabye hafi umwaka w’imishyikirano kugira ngo kigerweho.
Kugeza ubu, Umunyakanada umwe gusa ukomoka mu gihugu cya Congo ni we ugifungiwe muri Gereza ya Gisirikare ya Ndolo.
I Kinshasa, Ambasade ya Canada iracyategereje ariko amakuru avuga ko hari intamwe imaze guterwa ngo uyu Munyakanada ukomoka muri RDC na we arekurwe.
