Guverinoma ya Congo Kinshasa yatangaje ko yari imaze igihe iha umushahara abasirikare ba baringa barenga ibihumbi 300, ku buryo Leta y’iki gihugu buri kwezi yatakazaga $ miliyoni 70 (Arenga Frw miliyari 70) ihemba abasirikare batabaho.
Ni ibyatangajwe n’Urwego rushinzwe ubugenzuzi bw’imari muri Congo Kinshasa; nyuma y’igenzura ryimbitse ruheruka gukora.
Ni ubugenzuzi bwibanze ku nzego zirimo Igisirikare cya RDC (FARDC), Polisi y’Igihugu, Urwego rushinzwe kugenzura imishahara y’abarezi (SECOPE) ndetse n’abanyamabanga bakuru b’inzego za Leta.
Uru rwego mu itangazo rigenewe abanyamakuru ruheruka gusohora, rwagaragaje ko mu bugenzuzi rwakoze rwasanze hari abasirikare 145,604 bahembwaga na Leta, nyamara bafite numéro matricule (numéro iranga umusirikare) zitari zo cyangwa impimbano kugira ngo bahabwe umushahara.
Abasirikare 53,328 bo ubugenzuzi bwasanze bafite numĂ©ro matricule zirenze imwe; na ho 93,356 busanga bafite numĂ©ro matricule zisa n’iz’abandi basirikare na bo basanzwe bahembwa.
Usibye abasirikare ba baringa Leta ya Congo ivuga ko imaze igihe ihemba, hari kandi abakozi 43,725 ivuga ko yahembaga nyamara amazina yabo atagaragara ku rutonde rw’imenyekanisha rwerekana icyo basanzwe bakora; ndetse na 961 bahembwaga nk’abakora muri za Minisiteri zitandukanye ku buryo hari nk’abagaragara nk’abakozi mu bigo 15 bitandukanye.
RDC ivuga ko guhemba abakozi ba baringa byibura byayihombyaga arenga CDF miliyari 148 ($miliyoni 70) buri kwezi.
Urwego rushinzwe ubugenzuzi bw’imari muri Congo bwasabye Minisiteri y’Abakozi ba Leta muri iki gihugu gusukura ububiko ibikamo amakuru y’abakozi ba Leta kugira ngo imishahara ijye ihabwa abayikwiye.
Yavuze kandi ko bariya bakozi 961 bahemberwaga gukora muri za Minisiteri zitandukanye mu buryo bwa baringa bo bagomba gushyikirizwa ubutabera, bakabazwa amakosa yo kwigira za ‘mafia’ bashinjwa.
