Guhera kuwa 28 Nyakanga, igisirikare cy’u Rwanda cyatangiye igikorwa cy’iminsi itatu cyo gusenya toni zisaga 55 z’ibisasu byapfubye ndetse n’ibyarengeje igihe, mu Kigo cya Gisirikare cya Gabiro mu karere ka Gatsibo. Iki gikorwa kikaba cyarateguwe ku bufatanye bw’ikigo cyo mu karere gishinzwe kurwanya ikwirakwizwa ry’intwaro nto n’iziciriritse, RECSA, mu magambo ahinnye y’Icyongereza, ndetse n’inzego z’umutekano.
Iki gikorwa cyatangijwe ku mugaragaro n’umugaba mukuru w’ingabo z’u Rwanda zirwanira ku butaka, Maj Gen Jacques Musemakweli mu izina ry’umugaba mukuru w’ingabo z’u Rwanda, hari n’Umunyamabanga Nshingwabikorwa wa RECSA, Theoneste Mutsindashyaka.
Mu ijambo rye, Maj. Gen. Musemakweli yatangaje ko gusenya ibi bisasu ari ikimenyetso kigaragaza ubushake bwa guverinoma y’u Rwanda bwo gushyira mu bikorwa Amasezerano ya Nairobi (Nairobi Protocol) yo gukumira, kugenzura no kugabanya intwaro nto n’iziciriritse mu Biyaga Bigari no mu Ihembe rya Afurika, u Rwanda rubarizwamo.
Ni muri urwo rwego toni 52,807 z’amasasu zangijwe mu Rwanda kuva mu 1994 kugeza mu 2011, kuri iyi nshuro hakaba hagomba kwangizwa toni zisaga 55.
[xyz-ihs snippet=”google-pub”]
Umunyamabanga Nshingwabikorwa wa RECSA, Theoneste Mutsindashyaka, yashimiye leta y’u Rwanda ku ruhare igira mu gukumira, kugenzura no kugabanya ikwirakwizwa ry’intwaro nto n’iziciriritse (SALW).
Yashimiye uburyo bwa elegitoroniki bwo gushyira ibimenyetso bikorwa na polisi ndetse n’igisirikare, n’uko ishishikariza abaturage kwirinda ibyaha no guhuza amategeko agenga Intwaro nto n’iziciriritse.
Yashimiye kandi by’umwihariko guverinoma ya Leta Zunze Ubumwe za Amerika ku nkunga itera gahunda za RECSA zigamije guca ikwirakwizwa ry’intwaro nto n’iziciriritse.
Abandi bayobozi bari bahari barimo Umuyobozi w’Akarere ka gatsibo, Richard Gasana, Ushinzwe kurwanya ikwirakwizwa ry’intwaro nto n’iziciriritse uhagarariye RECSA mu Rwanda ariko akorera muri minisiteri y’umutekano, Misingo Karara Emmanuel, ndetse n’abashinzwe ubwirinzi muri ambasade za Sudani, Tanzania, na Uganda n’uwungirije ushinzwe ubwirinzi muri ambasade ya Amerika mu Rwanda.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com
