Abayobozi bo mu nzego z’ibanze bo mu gihugu cya Santarafurika bagera kuri 220, baturutse mu Turere umunani tw’umujyi wa Bangui hamwe n’abandi baturutse mu Turere tubiri tw’inkengero z’umujyi, kuri uyu wa kane tariki 19 Mutarama 2017, batangiye amahugurwa y’iminsi itatu ku bijyanye n’ibyiza byo gukora umuganda. Aya mahugurwa ari gutangirwa mu cyumba cy’inama cya FATEB kiri mu mujyi wa Bangui.
Ayo mahugurwa yateguwe na Batayo ya 3 y’Ingabo z’u Rwanda ziri mu butumwa bw’amahoro mu Muryango w’Abibumbye mu gihugu cya Santarafurika (MINUSCA). Impamvu y’ayo mahugurwa ni ugusangiza abayobozi b’ibanze hamwe n’abavuga rikijyana ba Bangui ibyiza by’umuganda, kugirango bizabe intangiriro nziza ku bayobozi mu gusobanurira abaturage bayobora ibyiza by’umuganda n’iterambere wabagezaho.
Umugaba wa Batayo ya 3 y’Ingabo z’u Rwanda ziri mu butumwa bw’amahoro muri Repuburika ya Santarafurika, Lt Col C KIRENGA yashimiye abitabiriye ayo mahugurwa kubera ubwitange bagize no kwigomwa akazi kabo ka buri munsi bakaza kuyitabira.
Yakomeje abagaragariza ko umuganda ari kimwe mu byabafasha kwiyubakira igihugu no guhuza abaturage mu bikorwa by’ubumwe n’ubwiyunge. Yagize ati “Niba ubuyobozi bw’ibanze muri Bangui mugize iki igitekerezo cyo gukorera hamwe mu muganda, ndabizeza ko muzakemura byinshi mu bibazo bibugarije mutarindiriye inzego zo hejuru za Guverinoma yanyu cyangwa imfashanyo y’abatera nkunga”.
[xyz-ihs snippet=”google-pub”]
Mayor w’Umujyi wa Bangui, Emile Gros-Raymond NAKOMBO wari uhari nk’umushyitsi mukuru uhagarariye Guverinoma ya Santarafurika yashimiye Ingabo z’u Rwanda ziri mu butumwa zateguye aya mahugurwa agenewe abayobozi b’abaturage ba Bangui. Yanashimiye Ingabo z’u Rwanda uburyo zikomeje gufasha Santarafurika kwiyubaka.
Ati “Muri hano muri mu butumwa bw’amahoro, ariko twe tunabafata nk’inshuti zikomeye bitewe n’imyitwarire, urukundo n’urugwiro mugaragariza abaturage bacu, ndabashimira cyane”
Aya mahugurwa ku byiza byo gukora umuganda yatangiye tariki 19 Mutarama 2017 azasozwa ku itariki 21 Mutarama 2017 aho abayitabiriye bari kumwe n’ingabo z’u Rwanda ziri mu butumwa i Bangui bazifatanya n’abaturage batuye Arrondissement ya Gatanu mu muganda wo gushyira mu bikorwa inyigisho bahawe.
Kanda hano ujye ubona amakuru yihuse kandi kugihe kuri Facebook no kuri twitter
@bwiza.com
