Igisirikare cy’u Rwanda (RDF) cyakiriye ku cyicaro cyacyo ku Kimihurura abasirikare bahagarariye ibihugu byabo, kibaganiriza ku ngingo zitandukanye zirebana n’umutekano.
Ingingo baganiriyeho zarebagana n’umutekano w’imbere n’uwo hanze, ubufatanye bwa RDF n’ingabo za Mozambique n’iza Repubulika ya Centrafrica ndetse n’ibikorwa byayo mu butumwa bw’amahoro mu bihugu bitandukanye.
Minisiteri y’ingabo isobanura ko iyi nama yateguwe n’ishami rya RDF rishinzwe ububanyi n’amahanga mu bya gisirikare. Harimo abasirikare 30 bahagarariye ibihugu byabo n’abandi bahagarariye ibihugu 23.
Ibi bihugu 23 ni: Algeria, u Bubiligi, Botswana, Canada, u Bushinwa, Repubulika ya Czech, Denmark, Misiri, u Bufaransa, u Budage, u Butaliyani, Kenya, u Buholandi, Poland, u Burusiya, Koreya y’Epfo, Sweden, Sudani, Turukiya, Uganda, Ubwami bw’u Bwongereza, Leta zunze ubumwe za Amerika na Zimbabwe.
Inama yakurikiwe n’uruzinduko aba basirikare n’abasivili bahagarariye ibihugu bitandukanye bagiriye mu ishuri rya gisirikare rya Gako.
Amafoto: Rwanda MOD
